Эрүүл мэндийн яам - Монгол улсын засгийн газар

Долоо хоногийн онцлох

Шинэ мэдээ мэдээлэл

Хэнтий аймгийн 300 гаруй алба хаагчдыг корона вирусын бэлэн байдлыг хангуулах сургалтанд хамрууллаа

Дэлхий нийтээрээ “Ковид-19” цар тахлын 2 дахь давалгаанаас урьдчилан сэргийлэх хариу арга хэмжээг авч хэрэгжүүлж байгаа энэ цаг үед манай улсын хувьд ч гэсэн хөдөө орон нутгийн шуурхай штабын баг бүрэлдэхүүн хэсгүүдийг чадавхижуулах цогц сургалтыг 21 аймгийн хэмжээнд зохион байгуулж эхлэсэн. Тодруулвал Монгол Улсын Шадар сайдын тушаалаар томилогдсон ажлын хэсэг 30 гаруй хүний бүрэлдэхүүнтэй коронавируст халдвараас урьдчилан сэргийлэх , хариу арга хэмжээ авах орон нутгийн Тохиолдлын удирдлагын тогтолцооны багийг чадавхижуулах, байнгын бэлэн байдлыг хангуулах сургалтыг зохион байгуулж практик сургуулилтыг тогтмол хийж хэрэгжүүлж байна. Энэ дагуу, Монгол Улсын Шадар сайдын зөвлөх Л.Саянаагаар ахлуулсан ажлын хэсэг 2020 оны 10 дугаар сарын 20-28-ны өдрүүдэд Хэнтий, Дорнод, Сүхбаатар аймагт ажиллаж байна. Ажлын хэсэг өнгөрсөн 9 дүгээр сараас эхлэн Баян-Өлгий, Ховд, Увс, Булган, Хөвсгөл, Орхон аймгуудад ажилласан бол энэ сарын 20, 21-ны өдрүүдэд Хэнтий аймагт 2 өдрийн сургалтаа зохион байгууллаа. Сургалтаар коронавируст халдвартай тэмцэх, сэргийлэх удирдлагын тогтолцоо, хяналт, эрсдлийн үнэлгээ, түүний харилцаа холбоо, олон эх сурвалжит мэдээллийн тандалт, хариу арга хэмжээний төлөвлөлт, хавьтлын судалгаа, хилийн нэвтрэх цэгийн хяналт зэрэг олон сэдвээр мэргэжлийн байгууллагууд сургалт, илтгэл практик сургуулилт зэргийг хослуулан явууллаа. Хэнтий аймаг нь ажлын хэсгийн сургалт хийж буй 7 дахь аймаг юм. Тус аймаг нь газар зүйн байрлалаасаа хамааран Дорнод, Сүхбаатар аймгуудаар дамжин өнгөрч буй хот хоорондын нийтийн зорчигч тээврийн хөдөлгөөн ихтэй бөгөөд корона вируст халдвараас урьдчилан сэргийлэх зорилгоор 3 удаагийн салбар дундын эрсдэлийн үнэлгээ хийхэд “Дунд магадлалтай” эрсдэлтэй гарсан байна. Энэ тохиолдолд аймаг, нийслэлийн мэргэжлийн багууд идэвхижиж байнгын бэлэн байдлыг хангаж ажиллах зөвлөмжтэй. Үүний дагуу Хэнтий аймгийн ОБГ, МХГ, ЭМГ, Авто Тээврийн Төв зэрэг байгууллагууд “Ковид-19” цар тахлын өндөржүүлсэн бэлэн байдлын үед хамтын уялдаа холбоотой ажиллаж 1008 том оврын автобус болон 40553 иргэдээр асуумж судалгаа бөглүүлж хяналт тавьж ажилласан талаар аймгийн эрүүл мэндийн газрын дарга Д.Баасандорж хэлж байлаа. Хоёр өдрийн сургалтанд Хэнтий аймгийн ХэАЗДТГ, МХГ,ОБГ, АЭМГ, Сум дундын штаб, ЗӨСТ, Мал эмнэлгийн газрын удирдлагууд болон холбогдох 120 гаруй мэргэжилтэнүүд хамрагдаж байна. Мөн тус аймгийн 18 сум, 4 тосгоны онцгой комиссын 170 гаруй алба хаагчид цахимаар сургалтанд оролцлоо. Шадар сайдын тушаалаар томилогдсон ажлын хэсгээр ахлуулсан баг ЭМЯ, УОК, ОБЕГ, МХЕГ, ХӨСҮТ, МУЗН, ДЭМБ зэрэг байгууллагуудын мэргэжилтэнүүдээр багаа бүрдүүлсэн бөгөөд энэ оныг дуустал 21 аймгийн холбогдох мэргэжлийн бүх нэгжүүдийг сургалтанд хамруулах гэнэ.

“ЗҮРХ СУДАСНЫ ҮНДЭСНИЙ ТӨВ”-ИЙН БАРИЛГЫН ЗУРАГ ТӨСЛИЙГ ЭРҮҮЛ МЭНДИЙН ЯАМ ХҮЛЭЭН АВЛАА

Монгол улсын хүн амын эрүүл мэндийн нэн тэргүүний тулгамдсан асуудал болох зүрх судасны өвчний оношилгоо эмчилгээг чанар хүртээмжийн хувьд олон улсын түвшинд хүргэх замаар иргэдийнхээ эрүүл мэндийг дээшлүүлэх нь төр засгийн онцгой анхаарал хандуулж буй асуудал мөн. Монгол улсын тогтвортой хөгжлийн зорилт 2030-д тусгасан зүрх судасны өвчний шалтгаант нас баралтыг 10 000 хүн амд 14 болгон бууруулах чиглэлд Засгийн газраас шат дараатай хэрэгжүүлж буй арга хэмжээний нэг нь өөрийн эх орондоо Зүрх судасны үндэсний төвийн барилгыг барихаар зураг төсөл хийх ажлыг олон улсын байгууллагатай амжилттай зохион байгуулсан. Энэхүү ажлын тод илрэл нь Люксембургийн Их Гүнт улсын буцалтгүй тусламжаар олон улсын тендерээр шалгарсан Испани улсын “ИДОМ” компани болон дотоодын ПиСиДиПи компани хамтран сүүлийн нэг жилийн хугацаанд “Зүрх судасны үндэсний төв”-ийн барилгын зураг төслийг хийж гүйцэтгэн хүлээлгэн өгч буй явдал юм. Люксембургийн Их Гүнт улсын буцалтгүй тусламжаар хийгдсэн “Зүрх Судасны Үндэсний Төв”-ийн барилгын зураг төслийг хүлээн авах хурлыг 2020 оны 10 сарын 20-ны өдөр Эрүүл Мэндийн Яаманд зохион байгууллаа. Тус хуралд Эрүүл мэндийн Дэд сайд Ш.Анхмаа, Эрүүл мэндийн яам, Улсын гуравдугаар төв эмнэлэг болон зүрх судасны төвийн төлөөлөл оролцсон. Эрүүл Мэндийн Дэд сайд хэлсэн үгэндээ зүрх судасны үндэсний төвийн барилга нь “Алсын хараа 2050” урт хугацааны хөгжлийн бодлого, “Тогтвортой хөгжлийн үзэл баримтлал 2030”, Засгийн газрын 2020-2024 оны үйл ажиллагааны хөтөлбөрт тусгагдсан ба Засгийн газрын хуралдаанаар зайлшгүй хэрэгжүүлэх том төслүүдийн жагсаалтад орсон нь Эрүүл Мэндийн яам болон Засгийн газрын дэмжлэг өндөр байгааг харуулж буйг онцоллоо. “Зүрх Судасны Үндэсний Төв”-ийн барилга нь 8 давхар /+зоорийн давхар/ газар хөдлөлийн 8 баллд тэсвэртэй. Барилгын нийт талбайн хэмжээ 15079 м², 427 өрөөтэй байхаар зураг төсөл хийгдсэн. Тус төв нь зүрхний мэс заслын 4 өрөө (1 гибрид мэс заслын өрөө), катетр лабораторийн өрөө 4 (1 электорфизиологийн өрөө), хэвтэн эмчлүүлэх 100 ортой байх ба зүрхний оношилгооны тасаг, зүрхний мэс заслын дараах сэргээн засах эмчилгээний тасагтай байхаар төлөвлөгдсөн.

УЛСЫН ГУРАВДУГААР ТӨВ ЭМНЭЛЭГ “УЛААНБААТАР БУЯН” ХХК-ТАЙ ХАМТРАН АЖИЛЛАХ САНАМЖ БИЧИГТ ГАРЫН ҮСЭГ ЗУРЛАА

Улсын гуравдугаар төв эмнэлэг нь Монгол улсын хэмжээнд зүрх судасны мэс заслын лавлагаа тусламж үйлчилгээг 50 гаруй жилийн турш тасралтгүй үзүүлсээр ирсэн билээ. Тус эмнэлгийн захиргаа хүүхдийн зүрхний төрөлхийн болон олдмол гажгийн тусламж үйлчилгээний чанар, хүртээмжийг нэмэгдүүлэх ажилд онцгойлон анхаарч зүрхний мэс засал эмчилгээ хийлгэх заалттай боловч санхүүгийн хүндрэлтэй байдлаас шалтгаалан тусламж үйлчилгээ авах хугацаа нь хойшлогдох магадлалтай гэр бүлийн 18 хүртэлх насны хүүхдүүдэд санхүүгийн дэмжлэг үзүүлэх ажлыг эрүүл мэндийг дэмжигч байгууллагуудтай хамтран үе шаттай хэрэгжүүлэн ажиллаж байна. Энэхүү үйл ажиллагааны хүрээнд 2020 оны 10 сарын 21-ний өдөр тус эмнэлэг, Улаанбаатар Буян ХХК-тай хамтран ажиллах "Санамж бичиг”-т гарын үсэг зурлаа. Уг санамж бичигт тус компани нь нийгмийн хариуцлагынхаа хүрээнд хүн амын эрүүл мэндийг дэмжих үйл ажиллагаанд идэвхи санаачлага гарган оролцож санхүүгийн боломжгүй, зүрхний гажигтай 18 хүртэлх насны хүүхдүүдийн мэс засал эмчилгээ хийлгэхэд иргэн өөрөө хариуцан төлөх төлбөрийн асуудлыг шийдвэрлэхээр эхний ээлжинд 20 сая төгрөгийн санхүүжилт хийхээр болсон. Монгол хүний амь нас, эрүүл мэндийг авран хамгаалах үйлсэд үнэтэй хувь нэмэр оруулж буй тус компанийн хамт олонд УГТЭ-ийн удирдлага, хамт олон талархалаа илэрхийллээ.

Монгол Улсын Засгийн газрын 2020-2024 оны мөрийн хөтөлбөрийг хэрэгжүүлэх үйл ажиллагааны төлөвлөгөөний дагуу Өвчний хяналтын төв (СДС) байгууллахаар ажиллаж байна

Эрүүл мэндийн яамнаас “Байгууллагын хөгжлийн төлөвлөлт” цуврал хэлэлцүүлгийг зохион байгуулж байгаа билээ. Өнгөрсөн долоо хоногоос Эрүүл мэндийн яамны газар, хэлтэс танилцуулга хийж эхлээд байгаа бөгөөд өнөөдөр Нийгмийн эрүүл мэндийн газар “Нийгмийн эрүүл мэндийн салбарын хөгжлийн бодлого төлөвлөлт”-ийн талаар танилцуулга хийв. Нийгмийн эрүүл мэндийг дэмжих хууль эрхзүйн орчин, салбарын ололт амжилт, тулгамдаж буй асуудал, төлөв байдал, хүн амын эрүүл мэндийн үзүүлэлт, хөгжлийн бодлого гэсэн зургаан сэдвийн хүрээнд танилцуулга хийгдлээ. 2009 онд Монгол хүний дундаж наслалт 71.8 байсан бол өнгөрсөн жил дундаж наслалт 76 болсон. Ард иргэдэд эрүүл амьдралын хэв маяг, зөв дадлыг хэвшүүлэхийн тулд нийгмийн эрүүл мэндийн боловсрол олгох, олон нийтийг соён гэгээрүүлэх мэдээлэл сурталчилгааны ажлыг тогтмол зохион байгуулж ирсэн. Эрүүл мэндийн сайд, Боловсрол, соёл, шинжлэх ухаан, спортын сайдын хамтарсан тушаалаар эрүүл мэндийн хичээл “бие даасан” цагтай болсон. Нийгмийн эрүүл мэндийн чиглэлээр 21 аймагт 63 багш, нийслэлийн 9 дүүргийн хэмжээнд 27, нийт 90 үндэсний сургагч багш ард иргэдэд мэдээ мэдээлэл хүргэн ажиллаж байна. 2018 онд Эрүүл мэндийн сайдын тушаалаар улс орон даяар хэрэгжиж эхэлсэн “Урьдчилан сэргийлэх, эрт илрүүлэх үзлэгт” одоогийн байдлаар 248 мянга гаруй иргэн хамрагдаад байгаа бол энэ жил “Боловсролын сургалтын байгууллагын багш ажилтныг хамруулах эрүүл мэндийн үзлэгт” 33 мянган хүн хамрагдаад байна. “Хүн амын хоол тэжээл”, “Халдварт бус өвчинтэй тэмцэх”, “Эх, хүүхэд, нөхөн үржихүйн эрүүл мэнд”, “Орчны эрүүл мэнд”, “Осол, гэмтлээс сэргийлэх”, “Халдварт өвчнөөс сэргийлэх, хянах”, “Эрүүл шүд - Эрүүл хүүхэд”, “Сэтгэцийн эрүүл мэнд” зэрэг үндэсний хөтөлбөрийн хэрэгжилт, явцын үр дүн болон бусад төсөл хөтөлбөрүүдийн талаар мөн танилцуулгад дурдлаа. Цаашид Монгол Улсын Засгийн газрын 2020-2024 оны мөрийн хөтөлбөрийг хэрэгжүүлэх үйл ажиллагааны төлөвлөгөөний дагуу 7 зорилтот арга хэмжээ хэрэгжүүлэх бөгөөд Өвчний хяналтын төв (СДС) байгууллахаар ажиллаж байна.

“АМЬГҮЙ ТӨРӨЛТИЙН ӨНӨӨГИЙН БАЙДАЛ” ЦАХИМ ХУРАЛ БОЛЛОО

ЭХЭМҮТ-ийн Тандалт судалгааны албанаас Эрүүл мэндийн сайдын А/207 тоот тушаалын 3.2.5, 3.2.6, 3.2.7 дахь заалтын дагуу “Амьгүй төрөлтийн өнөөгийн байдал” сэдэвт цахим хурлыг 2020 оны 10 сарын 16-ны өдөр зохион байгууллаа. Цахим хурлаар “Улсын хэмжээнд амьгүй төрөлтийн 2018-2020 оны эхний 9 сарын талаархи мэдээлэл” ТСА-ны эх барих эмэгтэйчүүдийн эмч Г.Батзул, ”Амьгүй төрөлтөнд төрөлхийн хөгжлийн гажгийн нөлөө, пренатал илрүүлэг” сэдвээр ЭХЭМҮТ-ийн НҮЗП-ийн перинатологич эмч Г.Сансар нар мэдээлэл хийв. Цахим хуралд аймаг, нийслэлийн ЭМГ-ын эх барих, эмэгтэйчүүд, нөхөн үржихүйн асуудал хариуцсан мэргэжилтэн, бүртгэл мэдээллийн мэргэжилтэн, БОЭТ, Нэгдсэн эмнэлгийн ЭМТҮЧАБА-ны дарга, менежер, эх барих, эмэгтэйчүүдийн эмч нар, зөвлөх эмч, статистикч эмч, мэргэжилтэн, өрхийн менежер бүхий 198 эмч, мэргэжилтэн Zoom-р холбогдлоо. Амьгүй төрөлтөнд хүргэдэг гол шалтгаануудын нэг болох төрөлхийн хөгжлийн гажиг, түүний шалтгаан, ЭМС-ын 2014 оны 428 тоот тушаал “Пренатал үеийн илрүүлэг, оношлогооны заавар”, пренатал илрүүлэгт хамрагдах заалт, төрөл, зөвлөгөө, мэдээлэл, жирэмсний хоёр дахь 3 сарын илрүүлгийн талаар, мөн ЭХЭМҮТ-ийн ЭБЭЭ-ийн зөвлөх эмч Н.Дашзэвгэ жирэмсэн үеийн шээс, бэлгийн замын үрэвслийн оношилгоо, шинжилгээ, жирэмсний хяналтын тушаал зааврын мөрдөлтөнд анхаарч ажиллахыг зөвлөв.

ХЭНТИЙН 120 ГАРУЙ АЛБА ХААГЧИД “КОВИД-19” ЦАР ТАХЛЫН ҮЕИЙН ТОХИОЛДЛЫН УДИРДЛАГЫН ТОГТОЛЦООГ БЭХЖҮҮЛЭХ СУРГАЛТАНД ХАМРАГДАЖ БАЙНА

УОК-ын Шуурхай штабын дарга, хурандаа Б.Ууганбаяр болон ХӨСҮТ-ийн Тандалт судалгааны албаны дарга А.Амбасэлмаа нараар ахлуулсан ажлын хэсэг “КОВИД-19” цар тахлын үеийн орон нутгийн “Шуурхай штаб, шуурхай хариу арга хэмжээний баг”-ийг бэлтгэх цогц сургалтыг Хэнтий аймгийн Чингис хотод зохион байгуулж байна. Сургалт энэ сарын 20, 21-ны өдрүүдэд тус хотын МСҮТ-ийн хурлын зааланд 09:00-18:00 цагийн хооронд үргэлжилэх юм. Хэнтий аймгийн хувьд сургалт зохион байгуулагдаж байгаа 7 дахь аймаг бөгөөд газар зүйн байрлалаасаа хамааран Дорнод, Сүхбаатар аймгуудаар дамжин өнгөрч буй хот хоорондын нийтийн зорчигч тээврийн хөдөлгөөн ихтэй байдаг байна. Харин иргэдийн шилжилт хөдөлгөөнд аймгийн ОБГ, МХГ, ЭМГ, ААТТ зэрэг байгууллагууд “Ковид-19” цар тахлын өндөржүүлсэн бэлэн байдлын үед хамтран уялдаа холбоотой ажиллаж 1008 том оврын автобус болон 40553 иргэдээр асуумж судалгаа бөглүүлж хяналт тавьж ажилласан байна. Өнөөдөр “Тохиолдлын удирдлагын тогтолцооны баг бүрэлдэхүүнийг чадавхижуулах сургалт”- нд Хэнтий аймгийн ХэЗДТГ, МХГ,ОБГ, АЭМГ, Сум дундын штаб, ЗӨСТ, Мал эмнэлгийн газрын удирдлагууд болон холбогдох 120 гаруй мэргэжилтэнүүд хамрагдаж байна. Шадар сайдын зөвлөх Л.Саянаа сургалтын зорилго, хүрэх үр днгийн талаар танилцуулга хийснээр сургалт өглөөний 9 цагт эхэллээ. Сургалтаар коронавируст халдвартай тэмцэх, сэргийлэх удирдлагын тогтолцоо, хяналт, эрсдлийн үнэлгээ, түүний харилцаа холбоо, олон эх сурвалжит мэдээллийн тандалт, хариу арга хэмжээний төлөвлөлт, хавьтлын судалгаа, хилийн нэвтрэх цэгийн хяналт зэрэг олон сэдвээр мэргэжлийн байгууллагууд сургалт, илтгэл практик дадлага зэргийн хослуулан явууллаа. Шинэ коронавируст халдвараас урьдчилан сэргийлэх зорилгоор тус аймгийн эрсдэлийн түвшинг үнэлэхэд “Дунд магадлалтай” буюу идэвхжилийн 1-р зэргийн эрсдэлтэй гарсан тул тухайн орон нутаг, нийслэлийн мэргэжлийн байгууллагууд идэвхжиж гамшгаас хамгаалах 11 алба, ерөнхий зориулалтын 23 мэргэжлийн анги, тусгай зориулалтын 22 мэргэжлийн анги, 18 сум 5 тосгонд сайн дурын хэсэг байгуулагдаж үйл ажилллагаа явуулж эрсдлийн түвшинг бууруулахаар ажиллаж байна. Аймгийн “Шуурхай штаб”-ын зүгээс аймгийн онцгой комиссыг тогтмол хуралдуулж 31 захирамж, 123 сая төгрөгийг гарган орон нутгийн хэмжээнд Коронавируст халдвар цар тахлаас урьдчилан тэмцэх хариу арга хэмжээг эрчимжүүлэн ажиллаж байгаа талаар тус аймгийн ЭМГ-ын дарга Д.Баасандорж танилцууллаа. Сургалтыг МУ-ын засгийн газар, Шадар сайдын ажлын хэсэг, ЭМЯ, УОК, ОБЕГ, МХЕГ, ХӨСҮТ, ДЭМБ-ын нэгдсэн баг хамт олон удирдан зохион байгуулж 21 аймгийн холбогдох байгууллагуудад системтэйгээр зохион байгуулж байна.

Гашуунсухайт хилийн боомт чиглэлийн авто замаар нүүрс тээвэрлэж буй жолооч нарт эрүүл мэндийн үзлэг зохион байгуулж байгуулж байна

Монгол Улсын Засгийн газрын 01 дүгээр албан даалгаврын хэрэгжилтийг хангах хүрээнд Өмнөговь аймгийн Ханбогд  сумын Хайрхан багийн “Цагаан хад”-ны суурьшлын бүсийн иргэд, Гашуунсухайт хилийн боомт чиглэлийн авто замаар нүүрс тээвэрлэж буй жолооч нарт эрүүл мэндийн үзлэг зохион байгуулах Эрүүл мэндийн сайдын 2020 оны А/423 дугаар тушаалын дагуу Улсын нэгдүгээр төв эмнэлэг, Улсын хоёрдугаар төв эмнэлэг, Улсын гуравдугаар төв эмнэлэг, Гэмтэл согог судлалын үндэсний төв, Сэтгэцийн эрүүл мэндийн үндэсний төв, Халдварт өвчин судлалын үндэсний төв, Эх, хүүхдийн эрүүл мэндийн үндэсний төв, Хан-Уул дүүргийн Эрүүл мэндийн төв, Өмнөговь аймгийн эрүүл мэндийн байгууллагын төрөлжсөн мэргэшлийн 40 гаруй эмчийн бүрэлдэхүүнтэй газар дээр нь очиж тусламж, үйлчилгээг үзүүлж эхэллээ.

ТӨСӨЛД САНАЛ АВЧ БАЙНА